小改變，大改善!

我同老公同好多香港人一樣，習慣對住部電視機食飯。差唔多睌睌如是。

最近屋企嚟咗位小客人，佢叫Hayley，响boarding school讀緊中三。由於term break嘅關係會係我哋屋企住幾日。Hayley係我同老公眾多留宿過夜嘅朋友仔當中年紀最細嘅，因此我同老公亦盡量留意照顧佢多啲。

至從Hayley加入我哋嘅飯局之後，由於梳化唔夠大，我哋最近番番去飯枱度食。估唔到竟然因此而得到'小改變，大改善'嘅收效。响飯桌上你一言，我一語；我pass張紙巾俾你，你又幫吓我夾餸。單單係傾談時能望住對方，一段普通嘅對話頓時變得既生動又活潑。

一天雖有二十四小時，但其實真真正正同家人見面嘅時間每日可能先得三至四個鐘。其中好多時重要包括埋沖涼，傾電話，上網，打機.....可能我哋不自覺地將同家人嘅溝通時間用'攝罅'形式馬馬夫夫咁帶一帶過就算，隨時打機嘅態度仲緊張認真過同阿媽傾計。

聖經裡面有句好正嘅金句：因 為 你 的 財 寶 在 那 裡 、 你 的 心 也 在 那 裡 。(馬太6:21) 同老公結婚時間越耐，越覺得關係嘅長闊高深非常在乎你願意投資同付出多少。

天父啊！願祢叫我生活上嘅大小習慣，都能做到榮神益人！