終於都放假啦!!!

終於都放假啦！但係雖然未飛返屋企，已經預測到將會超忙！有好多嘢要做，好多人要見，仲將有好多嘢要pick up...

求神祢保守我同阿Rod嘅假期，賜與我倆智慧去好好善用。保守我哋嘅安全，無論去邊度，都感受到祢嘅平安；亦保守我哋嘅心懷意念，任何時候都會做祢嘅好見証！

Deserve 唔 Deserve?

噚日係我嘅Annual Appraisal Day。

以前做學生時，每學期孝完試後都會有成績表。每一次從老師手上接住呢張 '生死狀' 時，嗰種心跳手震，呼吸困難，耳鳴頭暈嘅情況，諗起都心有餘悸。

噚日就係我打工仔時代嘅派成績表日。

成績係base on成年嘅表現。而更加殘酷嘅係响我上司appraise我之前，我要先appraise咗自己：要上網填一張極盡詳細嘅form，一分最好，五分最差；填完後submit俾我上司，佢睇完咗我俾自己嘅評分同comment，然後到佢俾....

自己俾自己分 - self appraisal - 絕對唔係一件容易嘅事：俾自己低分，心有不甘；俾自己稍為高分，又驚俾上司認為過於自大；假若佢俾得低過我自己俾自己嘅分數時，嗰種尷尬嘅感覺絕對係會叫我撼頭埋牆咁濟....

感謝神！我一路祈禱，一路填form，用最坦然同成實嘅心去完成佢。

當我每日都係以 '見一日過一日'，'煮到埋嚟就食' 嘅心態去處理工作時，由於每日都咁忙、咁多嘢做嘅關係，我真係無乜時間同空間去回想吓我工作嘅表現同態度。件事做完咗就算，無話點樣去諗番轉頭，亦唔太覺得自己做咗啲乜嘢唔好嘅地方。

但當做緊self appraisal時，好奇怪咁，腦海裏所諗到嘅，好多都係做錯、或做得唔好嘅事。好似不斷咁聽到一把聲音同自己講, '哇！咁你都做錯嘅？！' '咁簡單可以避免嘅你都錯得？！' '咁你都唔識？！唔係嘛....' 好老實講，當我做完咗個self appraisal時，我絕對唔覺得自己deserve呢份工，真係有無地自容嘅感受。

但surprisingly, 到最後我上司俾我嘅分數，係遠好過我自己俾自己嘅分數。可以攞到中上嘅成績，自己都不明所以。

我同我上司講，'I really don't deserve it.'

上司回答說, 'You know Irene, I won't give you anything that I think you don't deserve.'

我回答說, 'But I really think I don't deserve it!'

跟住我上司同我go through咗一連串嘅analysis，improvement plan，明年計劃等等...感謝神，整個過程都係愉快同有建設性。

我之後諗咗好耐我同上司以上嘅對話，天父籍此提醒咗我一件好重要嘅事。

我對神講, '神啊！我真係不配祢對我咁好！'

神回答，'我 未 將 你 造 在 腹 中 、 我 已 曉 得 你 、 你 未 出 母 胎 、 我 已 分 別 你 為 聖 ． 我 已 派 你 作 列 國 的 先 知 。' (耶1:15)

因 我 看 你 為 寶 為 尊 、 又 因 我 愛 你 、 所 以 我 使 人 代 替 你 、 使 列 邦 人 替 換 你 的 生 命 。(賽43:4)

我回答神說, '係啫！但係我真係唔值得祢咁愛我！'

神回答，說, '大 山 可 以 挪 開 、 小 山 可 以 遷 移 ． 但 我 的 慈 愛 必 不 離 開 你 、 我 平 安 的 約 也 不 遷 移 ． 這 是 憐 恤 你 的 耶 和 華 說 的 。 (賽54:10)

父 自 己 愛 你 們 、 因 為 你 們 已 經 愛 我 、 又 信 我 是 從 父 出 來 的 。 (約16:27)

我 賜 給 你 們 一 條 新 命 令 、 乃 是 叫 你 們 彼 此 相 愛 ． 我 怎 樣 愛 你 們 、 你 們 也 要 怎 樣 相 愛 。你 們 若 有 彼 此 相 愛 的 心 、 眾 人 因 此 就 認 出 你 們 是 我 的 門 徒 了 。(約13:34-35)

我 愛 你 們 、 正 如 父 愛 我 一 樣 ． 你 們 要 常 在 我 的 愛 裡 。你 們 若 遵 守 我 的 命 令 、 就 常 在 我 的 愛 裡 ． 正 如 我 遵 守 了 我 父 的 命 令 、 常 在 他 的 愛 裡 。' (約15:9-10)

無錯！我絕對係唔配神偉大豐盛嘅慈愛！但此刻我要做嘅，並唔係再同神去爭論配或不配嘅問題，而係要心存感恩嘅心，遵守主嘅命令，常活在神嘅愛入面，學習耶穌一樣，去榮神益人！