Eyewitness Travel - Barcelona

四日三夜嘅Barcelona之旅經已係上個星期五正式完滿結束。感謝神，除咗一啲小問題之外我同阿Rod嘅旅程都相當之順利。雖然行程緊凑，膊頭同雙腳都勁疲累(阿Rod話佢雙腳直程有撕裂嘅感覺)，但係所見，所聞，所經歷，所吃同所買嘅，完全係值得嘅！

遊覽Barcelona，當然係唔少得參觀著名嘅Architect Gaudi所design嘅buildings.但係當中係街度見到就算唔係Gaudi design嘅，好多都相當有特色。


除咗靚衫靚鞋店我鐘意去參觀之外，我都好鐘意行傢俬雜物店。Gaudi本身除咗係Architect外，佢對於Interior & Furniture設計亦同樣好掂。雖然相片所show嘅好多文物都有超過一百年嘅歷史，但展品當中有相當多嘅design就算依家睇落去都依然係潮爆！

宏偉嘅building通常樓底都超高，若果裡面無相當完善嘅燈光嚟照亮建築物嘅內部，單靠陽光都係未必夠。今次嘅旅行我所參觀嘅地方都有好多好grand同有特色嘅燈嚟襯托住各大師級嘅buildings，雖然呢啲燈都只係配角，但設計師依然係花足心思，叫我每一次嘅發現都哇-哇聲！

由於遊覽嘅buildings通常都相當之高嘅關係，我同老公有好多嘅機會可以參觀到Barcelona唔同角度嘅城市遠景。無耐我嘅傻瓜相機有心無力，影出嚟效果唔係咁好。

Barcelona嘅夜色亦相當迷人。若果夜睌無聊又唔想週圍行，我誠意推薦位於Placa d'Espanya嘅音樂噴泉(Font Magica)。個噴泉其實係National Palace (Palau Nacional)嘅一大遊覽景點特色。若果你係細個時曾經參觀過沙田新城市廣場嘅音樂噴泉亦曾經為此而發出過哇哇聲嘅話，我膽敢講句呢個Font Magica絕對唔會令你失望！

Barcelona嘅街景多姿多采，就算到半夜條街依然係人山人海 - 好多仲係local人添。真係好想問吓佢哋夜睌唔瞓但第二日都依然有精神返工嘅秘訣...

La Rambla嘅St. Josep Market亦係我同老公嘅至愛！入面除咗有好多古靈精怪嘅食品之外，裡面有一間即叫即煮嘅海鮮檔亦係我哋呢個trip嘅highlight！我哋連續兩次嘅brunch都係幫襯同一地方，絕對係食過番尋味！！！

講起食，Barcelona嘅海鮮絕對係抵食夾大件。而當地嘅咖啡更加係無論响邊度飲都咁香濃幼滑。我同老公都一致通過，最正嘅咖啡都依然係街市嗰間海鮮檔！實在係太令人回味無窮啦！！！

無論我係身在何處，本人嘅 '自動追貓狗器' 都會隨時候命，make sure我唔會miss咗任何可以比我摸吓掃吓啲貓仔狗仔嘅機會！今次嘅旅程好幸運地身邊嘅貓狗出現次數源源不絕。無耐有啲moment啲狗仔嘅行動實在係太迅速 (又或者係我攞相機嘅速度太慢)嘅關係，我未必每次都影到。以下嘅slide張張都有動物响度架！但條睇唔睇到就depends on 閣下雙眼夠唔夠利囉！呵呵呵！！！

睇咗咁耐，大家有無留意到上面啲相仲未有我哋兩公婆嘅出現呢？所謂好戲在後頭。各位觀眾，敬請密切留意下一篇嘅blog啦！

如要欣賞大師級嘅傑作，敬請click入去以下嘅網址:
http://www.pbase.com/studiocx/barcelona (大埔劉華嘅低調之作)

今日嘅節目時間又差唔多喇！多謝收看！聽日見！