講唔出有幾掛住你哋呀！！！

細個小學畢業時有過兩本記念卌, 裡面寫上好多美好既祝福話語, 或友誼永固既說話。但人越大, 就越明白自己嘅力量有幾細。有好多曾經甘苦與共既死黨, 都隨住時間嘅洪流自然流失。回憶嘅用處可能就係當人無法去圍繫住一段關係時嘅補償。難怪有好多人到年老時, 身邊未必有好多家人或朋友陪伴。回憶就仿似係好多老年人既最好伴侶。

每次返香港, 感覺永遠奇怪。當我一路忙碌咁應付現在式既人與事時, 我個腦卻又一路不由自住咁晌度與過去式奔馳。例如當我好enjoy咁同SOC嘅弟兄姐妹相聚晚飯時, 我那邊廂卻又不斷咁懷緬過去同大家一齊嘅時間: 一齊夾band, 一齊打牌, 一齊唱詩同敬拜, 仲有無盡渦心既分享...見面時嘅喜悅總係唔夠去cover離別時個份依依不捨。對朋友如是, 對家人更甚。難怪我每次返港時都係又愛又怕!

親愛既香港SOC弟兄姐妹, 多謝你地响百忙當中都全部出嚟一起相聚, 一個都無缺席! 我真係超感動! 多謝天父作我哋之間聯繫, 讓我哋可以無時無刻地為對方代禱。Terry & Sammie, 我會為你哋嘅工作同搬屋待禱; Antony & Polly, 我會為你哋沈長同忙碌嘅工作時間代禱; Ken & Lillian, 我會為你哋嘅工作環境代禱; Leslie & Shirley, 我會為你哋嘅屬靈生命同教會生活代禱。至於Brian....我希望你會enjoy同Terry & Sammie樓上樓下既neighbourhood啦 !

講唔出有幾掛住你哋呀！！！

靠著主撑落去呀！

已經有兩個星期無寫Blog。

去Florence前直踩咗七日，做到癲為咗慳假；萬料不到放完假後又要直踩多七日，今次係因為公司需要；然後我下個星期一要飛去公幹....我今次真係有做到虛脫嘅感覺...........

每一朝早鬧鐘一響，我感覺似從未瞓過咁；然後到真真正正起牀嗰一刻，我都要用極大嘅意志，叫自己嘅身體不再受高牀暖枕嘅誘惑，一枝箭咁衝去洗手間梳洗。原本化妝係應該因應住所着嘅衫嚟上色，我過去嗰七日所化嘅妝卻日日一色一樣，懶得襯。幸好我每日着嘅衫都唔同，otherwise我真係分唔出噚日嘅我同今日嘅我有乜嘢唔同........都係一樣咁疲憊不堪...........

星期一去公幹，行程緊凑。如果我唔得閑揾讀緊我個blog嘅你請千萬千萬不要見怪！

忙碌中幸好有阿Rod支持，搞掂咗好多家務同睌餐問題，叫我回家後可以快啲休息....仲有天父賜與我健康嘅身體，將工作續一完成....although still a long way to go，但我 靠 著 那 加 給 我 力 量 的 、 凡 事 都 能 作 ！(腓4:13)

加油呀Irene！靠著主撑落去呀！

Fantastic 4 Florence 遊

What makes a good trip? 正嘅食物？舒適嘅酒店？平靚正嘅shopping？有齊所有自然好。但今次Italy Florence一遊，令我覺得最開心暢快嘅旅行，係同一班志同道合嘅好友一齊縱橫四海。

細個時曾試過獨遊英倫。但結婚後呢啲'懶瀟灑'嘅行動已不堪回首。去旅行已經係婚後變成咗一件'眾數'嘅事。原本我係打算組織一隊四至六人嘅女子隊一齊快遊巴黎，點知到最後都掙一個人先能成為'雙數'隊伍。因此阿Rod就好幸運咁攝咗入嚟，而目的地亦由Paris改成Florence...

去旅行自然覺得應該係一件賞心悅事，但同樣亦係一個challenge。熟悉如自己老公，都可以為咗好小嘅事而鬧交。而我過往亦曾係旅遊時同弟兄姐妹不和，因此在選擇旅行partner時都會三思。今次有幸可以同Esther & Yvonne一齊旅行，之前亦為此多番祈禱：遊山玩水事小，玩完後反面事大。感謝神，係旅行過程中除咗我哋四個一次都無不和之餘，玩完後我哋感覺關係簡直就似一家人一樣！過程中當然有時候各人想做嘅嘢有唔同，但大家都好似有用之不盡嘅愛心，包容，忍耐同關懷等，令到每個選擇都唔難作決定。呢一切一切都係從神而嚟嘅！天父啊！祢真係好疼愛我哋呀！

好老實講，若大家有睇我五月份嘅blog，我同老公一齊去嘅Barcelona trip所見所聞，所吃所買嘅，都比Florence精彩。令到Florence呢個地方與眾不同嘅主要原因係因有Esther & Yvonne嘅陪伴。旅遊中有啲moment我真係覺得再行唔落去，又或者要係Uffizi門口排成兩個鐘頭隊 - 人生排最耐隊就係呢次 -，呢啲幾tough嘅moment，都因有佢哋作伴，以及當中無數嘅真心分享，或係笑到肚痛嘅笑話，令到呢啲原本唔好受嘅時刻亦在不知不覺中渡過。而Yvonne嘅超準Von Von navigation，Esther對財政或格價上嘅專業，實在叫我同阿Rod嘆為觀止！放心喇Von Von，就算你過咗25歲，我同劉華仲有大媽媽都依然非常願意同你一齊週圍癲架！

給A小姐的回信

親愛的A小姐，

非常多謝你的e-貓！做媽媽嘅你一定好安慰。有個又乖，又勤力，又考順嘅女兒，絕對係做父母嘅你嘅一大驕傲！

得知你最近嘗試返咗一次教會，我同老公都為此感到興奮同感恩。我知道星期日對香港人嚟講都係超重要嘅一日。就算唔行街shopping，留係屋企抖吓唔好過？！但somehow你內心有一絲絲說不出嘅感動，而最正嘅係你無俾呢小小嘅感動就咁就消失。你選擇咗去教會。就算明知嗰度唔識人，地方又陌生，但係你都要試一試，去認識一吓我個blog度經常提起嘅神係セ水。

你話你覺得做基督徒嘅我哋好開心，睇呢個世界セ嘢都好似好啲同靚啲。你講得一啲都無錯！皆因 神 造 萬 物 、 各 按 其 時， 成 為 美 好 ． 又 將 永 生 安 置 在 世 人 心 裡 ． (傳道書3:11)。世上無セ嘢比得上神嘅愛同埋佢賜比信佢嘅人永生嘅盼望。當你諗起你有個樣樣都會照顧週到，又超級愛你嘅天父時，你就會變得凡事都會獻上感恩：就連最差嘅天氣，你都會揾到佢美麗嘅地方。

當然，做咗基督徒之後我嘅生活都唔係一帆風順。同未信嘅人一樣，生活有起有跌。

我响Mauritius度讀中學時信主。有個好好嘅教會，弟兄姐妹相處容洽；我係教會度有好多好正嘅事奉，信仰生活都幾寫意。但家庭生活卻唔太理想...

有一日預備考A-level温書時，我父母吵鬧得好厲害。因為爸爸出現第三者嘅關係，我哋一家好似散哂咁。嗰段時間無論係媽媽，或係我哋三姐弟，都流咗好多眼淚。我不斷問神，點解會發生呢啲事，點解爸爸會寧願揀嗰個女人都唔選擇佢嘅家庭，點解...點解....但天父卻依然沉默。

神嘅沉默，令我以為佢唔再愛我。雖然我仍然繼續番教會，但我身體坐响church度，靈魂卻在反叛漂浮。我變得好怕返屋企，因為我好怨恨我爸爸，亦好怕見到我媽媽身心交瘁嘅樣子。我變得好麻目，淨係想逃避。因此明知我媽媽係唔夠錢供我到外國讀書，我都強迫佢放我走。

去到美國，我過住啲好孤僻嘅生活。我努力讀書，但其它一切我都置之不顧。我性格大變，我同自己講，淨係做應該要做嘅嘢就足夠。我唔好識咁多朋友，因為我唔想講太多自己嘅嘢。我無返教會，好刻意咁同神保持住距離，因為我覺得佢完全地孤負咗我。

好巧妙咁我認識咗阿Rod。交談時大家都有提及到宗教信仰，當時嘅佢對信仰觀念好糢糊。於是我慢慢咁以我所認識嘅同佢分享。當我以為佢唔會想繼續係呢個topic度傾落去時，我估唔到福音嘅種子已經散落咗响佢心底處。發展落去係明明我唔想講，唔想分享，唔想返教會，阿Rod都會鼓勵我繼續落去。天父响我人生嘅低谷處用愛去扶起我。响我最孤單無助嘅時候，佢賜與我依家嘅老公，作為我白頭偕老嘅終身伴侶。

天父認為漂撲嘅生活唔再適合我，佢帶領我由美國返到香港工作，再移居英國安定落嚟。我從未諗到神會賜與我一份office嘅工作，同埋咁正嘅SOC教會。佢從來都無離棄過我同我家：大細佬响新加坡大學畢業，最近仲結埋婚；細細佬考取到獎學金，有幸可以嚟英國深造，依家讀緊Year 2；而媽媽係幾年前都信埋主。雖然佢內心嘅傷可能永遠都不能完全被醫治，但佢學識咗點樣將一切都交托比主，因為神係好願意去擔起我哋背負唔起嘅傷痛。神 所 要 的 祭 、 就 是 憂 傷 的 靈 ．神 阿 、 憂 傷 痛 悔 的 心 、 你 必 不 輕 看 。 (詩篇51:17)

基督徒要經歷嘅苦難，同非基督徒嘅人並無セ嘢唔同。唔同嘅係我哋唔需要一個人孤單咁靠自己有限同微小嘅力量去面對。耶 和 華 是 我 的 力 量 、 我 的 詩 歌 、 也 成 了 我 的 拯 救 ． 這 是 我 的 神 、 我 要 讚 美 他 、 是 我 父 親 的 神 、 我 要 尊 崇 他 。 (出埃及記15:2)；但 我 要 歌 頌 你 的 力 量 、 早 晨 要 高 唱 你 的 慈 愛 ． 因 為 你 作 過 我 的 高 臺 ． 在 我 急 難 的 日 子 、 作 過 我 的 避 難 所 。 (詩篇59:16)。我同埋好多好多信神嘅基督徒一樣，我 靠 著 那 加 給 我 力 量 的 、 凡 事 都 能 作 。 (腓立比書4:13)

親愛嘅A小姐，我同阿Rod會為你祈禱。希望有一日你都會同我哋一樣，去親身經歷到主耶穌佢豐盛無限嘅慈愛！

敬祝 主恩滿溢！恩典常隨！

主內，
Irene上

突破殘酷星期一！

星期一，對於好多打工仔嚟講，係幾痛苦嘅一日。

有一個弟兄，無論禮拜曰夜睌個餐幾正都好，一到九點鐘左右，佢個樣就突然巨變，變得'苦過弟弟'！皆因生理嘅時鐘，強迫地令佢諗起假期將近結束，又要等足五日先有得抖嘅殘酷現實....通常呢個moment都會無セ人去安慰佢，因為各人都响度等緊其它人嚟安慰番自己....

剛過去嘅星期一，絕對係人生衆多個殘酷星期一嘅一個極大嘅突破！點解？皆因我同老公响倫敦生活咁耐，繼我媽咪之後，竟然有兩個靚女天使，係我哋未番到屋企之前，已經施展咗渾身解數，演出咗'美女廚房'嘅專業版，預備咗極度美味嘅晚餐嚟歡迎我哋歸家！四菜一湯 + 精美甜品 + 超低能、勁搞笑嘅笑話 + 真誠嘅靈裡分享，喂喂，呢啲星期一真係可遇不司求架！

Dear Esther & Yvonne, 六個字講哂: 感激！感動！感恩！無限歡迎你哋隨時再係我屋企度玩煮飯仔！實在係太正喇！！！

你睇我望住佢哋笑得幾開心！

Yvonne起菜lu...好嘢！

好菜到要開支酒慢慢'搭'真啲！

各位觀眾：The Fantastic 4 !

遙遠的他+她，一定要再歸家！

Dear Terry & Sammie,

上個星期三，你哋終於都走咗lu...我同大埔劉華有好多好多嘅唔捨得。

有啲朋友，見面時總係一句起，兩句止：一係就唔知講セ嘢好，一係就覺得同對方嘅交情尚未夠深，因此傾計時就總係衝破唔到，'你好嗎？幾好啦！食飯未？食咗喇！'嘅匡匡裡；當然，有啲更sad嘅，就係最好遇唔到。又或者係就算知道對方就係附近，但總會時運高，我睇你唔到，我係都睇你唔到....因為連應酬對方都費事哂心機。

非常感謝神，你同Sammie, 仲有Polly & Antony, Ken & Lilian, Leslie & Brian, 都係一班我哋好珍惜嘅主內弟兄姐妹。我哋每次相聚時，時間總係飛咁快過。要一齊enjoy嘅fun, 分享嘅事，開嘅玩笑，總係好似永遠都講唔完，做唔哂咁！

距離遠咗，要keep in touch係一件幾難嘅事。好彩我哋係基督徒，可以用祈禱代替思念。願神祝福你哋，早日適應新生活！身體健健康康！同埋快啲番嚟探我哋呀!

建築師的見觸思

剛過去嘅星期一睌，車神勁靚女帶咗我同老公去遊Costco同Ikea。願本個trip嘅目的係去買鞋，點知到最後鞋就買唔到，老公就狂掃咗一大堆唔太等駛嘅嘢返屋企！

雖然係我對上嗰個blog我先讚咗我老公shopping嘅態度良好，點知去到Costco同Ikea嘅佢簡直就好似變身成為另一個人！佢樣樣都話要買，好似唔使錢咁！雖然有啲嘢我都說服到佢唔好買，但係好不幸地佢硬係要買一大束草型物體嚟replace我原本啲花.....插好咗後我就覺得好有'綠柴'嘅感覺，而佢就話好contemporary....唉！難度啲建築師嘅審美眼光真係唔同啲？！

靚定唔靚，你話喇！

係呢度想特別鳴謝Esther嘅無限愛心！令平時沉悶平凡嘅星期一晚生色不少！下次一齊再去過呀！