人教B, 你教B 1

我同老公都慢慢開始留意身邊人教仔女既方法，也特別喜歡睇真人show如Suppernanny等節目。一路睇時一路係度諗：哇…如果呢個係我個仔/女既話咁就大鍋囉…

今日咁口岩俾我讀到一個媽媽得閒時諗定D野第時教囡時提自已既tips. 好笑之餘亦覺得好有道理喎…!

唔…等我都開始集低d將來教囝囡用既傻瓜ideas先!

出外飲食時如果發現碗入面有條頭髮／小菜虫，
請不要大驚小怪／尖叫／面容扭面／花容失色／向男伴求救….etc…

即其實煮食嘅温度呢，
一條頭髮或一條菜虫仔入面咩菌都會被煮死晒架啦，
挾走佢食埋碗野係一定唔會食得死你嘅。
之但係如果你真係接受唔到好想換過碗呢，
係可以嘅，
但請記住保持禮貌嘅態度同侍應交涉，
唔需要好似捉到姦情咁大件事嘅。
即如果食肆係有心整古你或者想整死你呢，
係應該唔會得一條頭髮或虫咁少嘅，
起碼都應該係一堆先合理。

整損手腳時請唔好用高八度嘅聲音嗌痛；

即如果你唔係受傷重到要入醫院治理個D，
咁嗌幾聲就夠架啦，
你身邊嘅人已經知你有幾痛，
同埋唔該用個低少少嘅聲調去嗌。
唔駛不停咁依依鞋鞋咁鞋足全日，
你會令身邊嘅人好想打鑊你的。

稚齡時嘅你請唔好要求搽指甲。

我實在係諗唔到有咩理由小朋友要搽指甲，
仲要係七彩連腳甲個隻。
我係唔會俾甲油你玩，
但如果你恨試到會嘗試用美術課嘅顏料黎油黑晒D指甲咁我又唔會阻你嘅，哈哈～